հետ

ՊԱՏՄՈՒԹՅՈՒՆ

Թիֆլիսի առևտրային բանկի Երևանյան մասնաճյուղից մինչև «Կամար» բիզնես կենտրոն

ՀԻՄՆԱԴՐՄԱՆ ՊԱՏՄՈՒԹՅՈՒՆԸ

1910թ. Երևան քաղաքի գլխավոր ճարտարապետ Բորիս Մեհրաբյանի թույլտվությամբ Տեր-Ղուկասյան փողոցում` ռուսական ուղղափառ եկեղեցու դիմաց, Թիֆլիսյան առևտրային բանկի Էրիվանյան մասնաճյուղի (որը բացվել էր դեռևս 1895թ. Աստաֆյան (այժմ` Աբովյան) փողոցում) համար կառուցվում է նոր շենք` նշանավոր ճարտարապետ Միքայել Օհանջանովի նախագծով:

1916թ. Թիֆլիսի առևտրային բանկը վերանվանվում է Կովկասյան բանկի, համապատասխանաբար` մասնաճյուղը վերանվանվում է Կովկասյան բանկի Էրիվանյան մասնաճյուղի: Բանկը գործում է Տեր-Ղուկասյան փողոցում մինչև 1920թ.:

Բանկի նոր շենքը համահունչ էր հրապարակի ընդհանուր համալիրի և Նիկոլաևյան Սուրբ Աննայի վեհաշուք տաճարի տեսքին:

ՇԵՆՔԻ ՄԵԿԴԱՐՅԱ ՊԱՏՄՈՒԹՅՈՒՆԸ

Էրիվանյան մասնաճյուղի նոր շենքի նախնական պլանը ներառում էր երկհարկանի գլխավոր մասնաշենքը Տեր-Ղուկասյան փողոցում: Ավելի ուշ նախագծին ավելանում է նոր թևը՝ Բազառնայա (ներկայումս՝ Խորենացի) փողոցում: Արդյունքում ստացվում է Г-անման շինություն՝ փողոցների անկյունային հատվածում:

Կովկասյան բանկի «Էրիվան» մասնաճյուղի հաշիվների հաշվառման գրքերը:

Այդ նշանավոր շենքում հետագայում գործունեություն են ծավալել Հայաստանի Կոմունալ բանկը, Շինբանկի հայկական գրասենյակը, ԽՍՀՄ-ի Արտաքին առևտրային բանկի հայկական գրասենյակը, ԽՍՀՄ Արտաքին տնտեսական բանկի հանրապետական մասնաճյուղը, «Հայկական Ներմուծման-Արտահանման Բանկ» ՓԲԸ-ն, «Հայներարտբանկ» ՓԲԸ-ն, որն էլ 2008թ. վերանվանվեց «Ամերիաբանկ» ՓԲԸ-ի: Ճարտարապետ Ալեքսանդր Թամանյանի կողմից 1924թ. մշակվում է Երևանի գլխավոր հատակագիծը: Հանրապետության արագ աճող տնտեսության պայմաններում անհրաժեշտություն է դառնում նոր քաղաքացիական կառույցների շինարարությունը, մասնավորապես բանկերի համար շենքերի կառուցումը: Գյուղատնտեսական բանկի շենքի կառուցման գաղափարը պատկանում է Ալեքսանդր Թամանյանին: Նրա ղեկավարությամբ ստեղծվում է հատուկ հանձնաժողով` Գյուղբանկի կառուցման համար: 1926թ. նշանավոր ճարտարապետ Բունիաթովի և Գյուղատնտեսական բանկի միջև ստորագրվում է պայմանագիր` բանկի շենքի նախագծման նպատակով: 1927թ. սկսվում է նաև բանկի աշխատակիցների համար հանրակացարանի շենքի կառուցումը:

Մինչև Ցարական Ռուսաստանի անկումը Թիֆլիսի առևտրային բանկի Էրիվանյան մասնաճյուղը զբաղվում էր ոչ միայն իր հիմնական գործառույթներով, այլև նորաթուխ մասնագետների մատակարարմամբ:

Սև շենքը և Երևանի մոխրագույն մարգարիտը

Կոմունալ բանկի սև շենքը և Գյուղբանկի՝ Երևանի մոխրագույն մարգարիտը երկար տարիներ ծառայում են զանազան պատկառելի հաստատությունների՝ մշտապես մնալով երևանցիների ուշադրության կենտրոնում:

ՊԱՀՊԱՆԵԼՈՎ ՀԻՆԸ՝ ԿԵՐՏԵՆՔ ՆՈՐԸ

ԺԱՌԱՆԳՈՒԹՅՈՒՆ ՆՈՐ ՍԵՐՈՒՆԴՆԵՐԻՆ

Ժամանակն անդառնալի հետք է թողել այս փառավոր կառույցների վրա` խարխլելով նրանց հիմքը և աղավաղելով սկզբնական տեսքը, այնպես որ շենքերի ենթակառույցները այլևս չէին համապատասխանում ժամանակակից տեխնոլոգիական պահանջներին: Կարևորելով շենքերի պատմական և ճարտարապետական նշանակությունը և դրանք պահպանելու անհրաժեշտությունն ու գալիք սերունդներին ժառանգելու առաքելությունը` «Կամար» բիզնես-կենտրոնի նախագծի հեղինակները ամենայն պատասխանատվությամբ ու մեծ հոգածությամբ են նախաձեռնել քաղաքի առաջին բանկերի վերակառուցման աշխատանքները` պահպանելով հինը ու կերտելով նորը:

ԿԱՄՐՋԵԼՈՎ ՀԻՆՆ ՈՒ ՆՈՐԸ

Սիրով ձեզ ենք ներկայացնում «Կամրջելով հինն ու նորը» գրքի օնլայն տարբերակը

READ THE BOOK